Почитувани членови на семејството на Американ Колеџ

Денес, е посебен ден!

И навистина ми е чест и задоволство што сме сите тука и што заедно ќе го означиме официјалниот почеток нa прославата на овој наш голем и значаен јубилеј – 20 години постоење на Универзитетот Американ Колеџ Скопје.

Му благодарам на ректорот Бојаџиев за неговиот осврт на овој наш јубилеј.

Ќе се надоврзам и ќе зборувам за неколку работи кои се столбот на Американ и на нашето постоење. Ќе зборувам за основата на оваа убава приказна која ја започнавме и која ќе го продолжи својот пат и во наредните 20 години, а и повеќе.

Денес сакам да зборувам за она што го прави Американ тоа што е - а тоа се луѓето. Тоа сте вие. Тоа е вашата посветеност.

Сакам да зборувам за успесите кои сме ги постигнале преку заедништвото кое живее на Американ и за тимскиот дух кој се темели врз вредностите на личен интегритет, напорна работа и почит кон другиот.

Пред дваесет години, кога го основавме Американ, имавме една идеја – која беше храбра, можеби и амбициозна – но беше многу конкретна и јасна. Да создадеме образовна институција која ќе гради кариери, но пред сѐ карактери, која ќе го трансформира општеството преку знаење, ќе ги следи највисоките светски стандарди на академска извонредност.

Но она што е поважно, сакавме да изградиме заедница. Да изградиме тим.

Во меѓувреме, создадовме семејство.

И денес, ние сме токму тоа - универзитет каде што луѓето се најважни и се тајната состојка за успех.

Сѐ што сме постигнале – е резултат на вашиот личен влог и на заедничката работа. Резултат на доверба. На посветеност. На вредностите што ги споделуваме.

Од една училница и канцеларија со само неколку вработени, јас денес, ви се обраќам од амфитеатар во сериозен универзитетски кампус со повеќе од 250 членови на Американ семејството, кои се едни од најпосветените луѓе во секторот образование во државата. Тоа е само еден видлив пример како изгледа посветена работа и растење заедно.

Над 8000 студенти е бројка на која секако сите тука сме горди, но уште повеќе сме горди на она што ги прави нашите студенти посебни: нивната ангажираност, вредностите што ги носат, начинот на кој се трудат секој ден да се дел од нешто поголемо. Нашата заложба била и останува да создадеме граѓани на светот – и навистина е задоволство да се види тоа во секој еден наш студент.

И сето ова е вистина и факт, благодарение пред сѐ на нашите професори и останатиот академски кадар кој има постигнато одличен академски успех и е секако благодарение на меѓународните соработки, и нашите колеги професори од странство. Резултат е и на тимската работа која е наш заштитен знак.

Со истата посветеност и тимска заложба ја создовме и Американската Гимназија Скопје што е уште еден исклучителен успех за нас. Успех кој ќе е мотивација да продолжиме понатаму, уште посилно.

Изминативе две декади заедно направивме навистина многу. И тоа вреди да се прослави.

Затоа, од денес па во месеците кои следат, организираме низа настани и активности со кои ќе го одбележиме овој значаен јубилеј од кои би издвоила две клучни работи:

Првата е планираниот едукативен форум, на кој ќе зборуваме за иднината на образованието во Македонија. Тој ќе биде точка на пресврт, клучен момент од кој ќе произлезат многу нови идеи, важни за образованието во земјата. Секогаш сме биле предводници на новите идеи, така ќе биде и понатаму.

Исто така, на моја особена чест и задоволство би сакала да најавам дека по повод 20 години постоење, Американ ќе ја додели титулата Професор Honoris Causa на проф. д-р Светлана Мојсов, која е светски призната биохемичарка, професорка на Рокфелер Универзитетот, член на Американската академија на науки, која стои зад револуционерното откритие за лекување дијабет.

Со оваа почесна титула за проф. Светлана Мојсов, не само што оддаваме признание за нејзината исклучителна академска кариера, туку и на нашите студенти им даваме пример за интегритет, извонредност и за тоа како знаењето може да се стави во служба на човештвото.

Сите активности кои се планираат за јубилејот пред сѐ ќе ги посветиме на нашите достигнувања, но воедно ќе го држиме погледот напред, кон нови успеси.

Достигнувања, имавме навистина многу. Успеси, нѐ очекуваат уште повеќе.

Но јас пак ќе кажам - и сето она што сме го направиле и сето она кое нѐ очекува, нема да биде возможно без најважното, без она што е срцето на Американ, а тоа се секако луѓето.

Затоа што на Американ, зад секој успех стои човек. Стои тим. Стоите ВИЕ. Професорите, административниот кадар, раководните тимови. Стоиме сите НИЕ.

Секој од вас има оставено силен печат на ованаше патување. Во секоја диплома, во секој реализиран проект, во секој момент кога некој студент добил шанса да ги следи своите соништа – таму сте вие.

Овие 20 години се доказ дека кога визијата е искрена, кога тимот е обединет и кога она што се работи, се работи со срце – тогаш резултатите се неизбежни.

Затоа, на сите вас, од кои многумина се тука од самиот почеток — ви изразувам огромна БЛАГОДАРНОСТ ЗА СЀ. Вашата посветеност, знаење и грижа ја создадоа оваа институција.

Уште поважно, ВИЕ сте оние кои создадовте заедница која ја одржа нашата приказна сите овие години. Заедница од луѓе кои се различни, но делат иста вредност: верба дека образованието менува животи.

Затоа, ова не е само јубилеј што го бележиме со бројка – ова е приказна испишана со посветеност, визија и пред сè – со луѓе.

Денес не славиме само минато – туку славиме и иднина.

Затоа, ве уверувам дека приказната на Американ продолжува.

А најдоброто следи.

Затоа што со ваква заедница, со ваква доверба и со ваква љубов – сè е возможно.

Честитки до сите, да ни се множат годините и да редиме само успеси и понатаму!

Ви благодарам