Во рамки на предметот Урбанизам 1, студентите од трета година на Факултетот за архитектура и дизајн при Универзитет Американ Колеџ Скопје реализираа заедничка едукативна активност со Здружението за активно вклучување и соодветен третман на лицата сомпопреченост - Икулити од Скопје, посветена на унапредување на пристапноста во објектите и јавните простори.

Преку дискусија, предводена од Гере Трипков, основачот на здружението и предавање од Доц. д-р. Павел Вељаноски, на студентите им беа презентирани позитивни практики и инспиративни примери, со што истите беа охрабрени да размислуваат за универзалниот дизајн како неопходен дел од современото урбанистичко и архитектонско планирање.

Активноста продолжи со теренска вежба, каде студентите имаа можност непосредно да искусат како архитектонските бариери го отежнуваат секојдневното функционирање на лицата со попреченост, препознавајќи ги реалните предизвици со кои тие се соочуваат во движењето низ градот.

Со вклучување на млади идни архитекти и урбанисти во вакви образовни процеси, UACS продолжува да ја гради заедницата на професионалци ориентирани кон создавање инклузивна, достапна и безбариерна средина за сите граѓани.